بلخ کې د جعلکارۍ په تور شپږ کسان نیول شوي
د بلخ امنیې قوماندانۍ ویلي، په مزارشریف ښار کې یې د جعلکارۍ په تور شپږ کسان نیولي دي.
د خبرپاڼې له مخې، نیول شوي کسان به له بېلابېلو دوکانونو څخه توکي په ټیټه بیه اخیستل، وروسته به یې د جعلي بېلونو او اسنادو په جوړولو سره په لوړه بیه پلورل، چې له دې لارې یې د خلکو د مالي زیان سبب کېدل.
سرچینه زیاتوي، یاده شپږ کسیزه ډله د امنیتي ځواکونو له لوري د ترلاسه شویو معلوماتو پر بنسټ پېژندل شوې او د ځانګړو عملیاتو په ترڅ کې نیول شوې ده.
د بلخ امنیې قوماندانۍ ټینګار کړی چې د اسلامي امارت امنیتي او عدلي بنسټونه د خلکو د حقونو د خوندیتوب، د قانون د حاکمیت او د اقتصادي نظام د شفافیت لپاره جدي هڅې کوي او هېچا ته به اجازه ورنه کړل شي چې د غیرقانوني کړنو له لارې د خلکو له حقونو ناوړه استفاده وکړي.
مسوولین همداراز وایي چې د ورته قضیو د مخنیوي لپاره به د څارنې او کنټرول بهیر لا پسې پیاوړی شي، څو په ټولنه کې امنیتي او اقتصادي ثبات ټینګ پاتې شي.
