جاوید بشارت خپل روسي سیال ته ماتې ورکړه
د افغانستان مبارز جاوید بشارت د «PFL» سازمان په سیالیو کې خپله لومړۍ مبارزه په بریا پای ته ورسوله او روسي سیال موسار ابراهیموف ته یې د داورانو په پرېکړه ماتې ورکړه.
دغه مبارزه یکشنبه سهار د امریکا په واشنګټن ډيسي ښار کې د ۶۱ کیلوګرامه وزن په کټګورۍ کې ترسره شوه.
بشارت د سیالۍ تر پای وروسته د امتیازونو له مخې له خپل سیال مخکې شو او ګټونکی اعلان شو.
له دې بریا سره د بشارت مسلکي بریاوې ۱۶ ته ورسېدې، په داسې حال کې چې نوموړي په مسلکي کارنامه کې دوه ماتې هم لري.
بشارت تر دې وړاندې د «UFC» سازمان په سیالیو کې مبارزه کوله، خو په «PFL» کې یې حضور په بریا پیل کړ.
موسار ابراهیموف په روسیه کې زېږېدلی او د بلجیم تر بیرغ لاندې سیالۍ کوي.
نوموړي تر بشارت وړاندې په نهو مسلکي مبارزو کې اته بریاوې او یوه ماتې لرله، خو بشارت یې دویمه ماتې ور واړوله.
