د ایران د بندیزونو د لغوه کېدو په اړه د بریتانیا، فرانسې، جرمني او ایټالیا ګډه اعلامیه
د بریتانیا، فرانسې، جرمني او ایټالیا مشرانو په یوه ګډه اعلامیه کې ویلي چې که د ایران اسلامي جمهوریت د خپل سولهییز اټومي پروګرام په تړاو روښانه او عملي ګامونه پورته کړي، نو د لګول شویو بندیزونو د لغوه کېدو زمینه برابره کېدای شي.
د راپورونو له مخې، دغو اروپايي هېوادونو ټینګار کړی چې د موضوع د حل لپاره لا هم ډیپلوماسي او خبرې اترې تر ټولو غوره لاره ګڼي او په همدې چوکاټ کې د تفاهم او متقابلو هوکړو ملاتړ کوي.
په اعلامیه کې راغلي چې د خبرو اترو دوام او د باور جوړونې اقدامات کولای شي د شته اختلافاتو د کمېدو او د سیاسي تفاهم د پراخېدو لپاره زمینه برابره کړي.
دا څرګندونې په داسې مهال مطرح کېږي چې د ایران اسلامي جمهوریت تل د خپل اټومي پروګرام پر سولهییز ماهیت ټینګار کړی او ویلي یې دي چې د هېواد اټومي فعالیتونه د نړیوالو اصولو او قانوني چوکاټونو په رڼا کې پر مخ وړل کېږي.
شنونکي باور لري چې د بندیزونو د کمېدو او د سیاسي تفاهم د پراخېدو هر ډول پرمختګ به د سیمې پر اقتصادي او سیاسي وضعیت مثبت اغېز ولري او د متقابلو همکاریو لپاره به نوې زمینې رامنځته کړي.
