د حج له لګښتونو پاتې پیسې حاجیانو ته بېرته ورکول کېږي
د ارشاد، حج او اوقافو وزیر شیخ نورمحمد ثاقب ویلي، سږ کال د حج فریضې د ادا کولو لپاره له ۳۰ زره حاجیانو څخه راټولې شوې پیسې، له ټولو لګښتونو وروسته، اضافه پاتې شوې دي او د ټاکل شوې پرېکړې له مخې به هر حاجي ته خپله برخه بېرته ورکړل شي.
نوموړي د حکومت د اطلاعاتو او رسنیو په مرکز کې د «حاجیانو ته د حج له لګښتونو څخه د پاتې پیسو د بېرته ورکولو» غونډې پر مهال وویل، د حج مراسمو لپاره ټولټال ۷ میلیارده، ۸۱۸ میلیونه، ۳۰۷ زره او ۲۰۰ افغانۍ راټولې شوې وې، چې له دې جملې ۷ میلیارده، ۷۲۳ میلیونه، ۷۴۱ زره او ۵۸۳ اعشاریه ۶۰ افغانۍ لګول شوې دي.
د هغه په وینا، له ټولو لګښتونو وروسته ۹۴ میلیونه، ۵۶۵ زره او ۶۱۶ اعشاریه ۴۰ افغانۍ پاتې شوې دي، چې د محاسبې له مخې به هر حاجي ته ۳ زره او ۲۲۳ افغانۍ بېرته ورکړل شي.
د ارشاد، حج او اوقافو وزیر ټینګار وکړ چې د پاتې پیسو د بېرته ورکړې بهیر به د ټاکل شوي میکانیزم له مخې په شفاف ډول ترسره شي، څو هر حاجي خپله ټاکل شوې اندازه ترلاسه کړي.
