د شهید رهبر په غم کې د استاد معصومي د خواخوږۍ پیغام؛ له ایران سره همدرد یو
استاد سید جلال معصومي، د ایران اسلامي جمهوریت د درېیمې ټلوېزیوني شبکې د «محفل» پروګرام قاضي او کارپوه، د اسلامي امت د شهید ستر مشر د شهادت په مناسبت پر خپلې انسټاګرام پاڼې د خواخوږۍ او غمرازۍ پیغام خپور کړی دی.
نوموړي خپل پیغام د قرآن کریم د «يَا أَيَّتُهَا النَّفْسُ الْمُطْمَئِنَّةُ» مبارک آیت او د بدرګې د مراسمو له انځورونو سره خپور کړی او د اسلامي امت د شهید ستر مشر پر مړینه یې ژوره خواشیني څرګنده کړې ده.
معصومي په خپل پیغام کې د افغانستان او ایران اسلامي جمهوریت د ولسونو ترمنځ پر دیني، تاریخي او فرهنګي اړیکو ټینګار کړی او ویلي یې دي چې د دې ستر غم په شېبو کې د ایران اسلامي جمهوریت ملت یوازې نه دی او د اسلامي نړۍ د مسلمانانو خواخوږي ورسره مل ده.
د نوموړي دغه پیغام په ټولنیزو رسنیو کې پراخ غبرګونونه راپارولي او ګڼو کاروونکو هغه د دواړو ملتونو ترمنځ د یووالي، همدردۍ او ګډو اسلامي ارزښتونو څرګندونه بللې ده. معصومي په خپل پیغام کې د «تاسو یوازې نه یاست» جمله د اسلامي ورورولۍ، خواخوږۍ او متقابل ملاتړ د څرګند سمبول په توګه یاده کړې ده.
