مودي: د هند او امریکا ستراتېژیکې اړیکې به لا پیاوړې شي
د هند لومړي وزیر نریندرا مودي د امریکا د بهرنیو چارو وزیر مارکو روبیو د لیدنې هرکلی کړی او ویلي یې دي چې له نوموړي سره یې د هند او امریکا د جامع نړیوالې ستراتېژیکې ملګرتیا د لا پراختیا، د دوهاړخیزو اړیکو د پیاوړتیا او د سیمهییزې او نړیوالې سولې او امنیت د مسایلو په اړه تفصیلي خبرې کړې دي.
نریندرا مودي په خپل پیغام کې ټینګار کړی چې هند او امریکا د نړۍ په مهمو اقتصادي او سیاسي لوبغاړو کې راځي او د دواړو هېوادونو ترمنځ همکاري نه یوازې د خپلو خلکو په ګټه ده، بلکې د نړیوال ثبات او پرمختګ لپاره هم مهم رول لري.
هغه ویلي، په دې لیدنه کې د ستراتېژیکې همکارۍ د لا ژورولو، د سوداګرۍ او ټکنالوژۍ په برخو کې د اړیکو د پراخولو، او د امنیتي همکاریو د پیاوړتیا پر موضوعاتو خبرې وشوې.
مودي زیاته کړې چې دواړه هېوادونه به د ګډو نړیوالو ننګونو پر وړاندې، لکه ترهګري، اقتصادي بېثباتي او سیمهییزې شخړې، د ګډې همکارۍ له لارې د نړیوالې ښېګڼې لپاره خپلې نږدې اړیکې لا پیاوړې کړي.
