کابلوف: افغانستان کې د روسیې ساخت پوځي تجهیزات ترمیم کېږي
ضمیر کابلوف، د افغانستان لپاره د روسیې د ولسمشر ځانګړي استازي ویلي، د روسیې او افغانستان ترمنځ د نظامي او تخنیکي همکاریو د هوکړې لومړی پړاو به په افغانستان کې د روسي جوړو پوځي تجهیزاتو د ترمیم او بیا فعالولو له بهیر څخه پیل شي.
روسي رسنیو د کابلوف له قوله راپور ورکړی چې دغه ګام د دواړو هېوادونو ترمنځ د تخنیکي همکاریو د پراختیا په لړ کې مهم بلل کېږي او تمه ده د راتلونکو ګډو همکاریو لپاره لا مناسب فرصتونه برابر کړي.
نوموړي ټینګار کړی چې د یادې هوکړې عملي کېدل کولی شي د تجهیزاتو د ساتنې، تخنیکي ظرفیت لوړولو او اړینو برخو کې د همغږۍ د پیاوړتیا زمینه برابره کړي.
دا څرګندونې داسې مهال کېږي چې په وروستیو کلونو کې د کابل او مسکو ترمنځ سیاسي، اقتصادي او تخنیکي اړیکې پراخې شوې دي، او دواړه لوري هڅه کوي په بېلابېلو برخو کې خپلې همکارۍ لا پیاوړې او منظمې کړي.
