په ۲۱ ولایتونو کې د ورښت او سېلابونو اټکل شوی
د ټرانسپورټ او هوايي چلند وزارت د هواپېژندنې ادارې په ۲۱ ولایتونو کې د ورښت او سېلابونو د راوتلو اټکل کړی دی.
د یادې ادارې د خبرپاڼې له مخې، سبا په بدخشان، تخار، کندوز، بغلان، سمنګان، بلخ، سرپل، پنجشېر، پروان، کاپیسا، لغمان، نورستان، کونړ، ننګرهار، کابل، لوګر، پکتیا، خوست، پکتیکا، میدانوردګ او بامیان ولایتونو کې د بارانونو احتمال شته.
سرچینه وایي، په دغو ولایتونو کې د ورښت کچه له ۱۰ تر ۳۵ مليمتره پورې اټکل شوې ده.
د هواپېژندنې ادارې همداراز په مرکزي او سوېلختیځو ولایتونو کې د تېزو بادونو، خاورو او دوړو د راټوکېدو خبرداری ورکړی، چې سرعت به یې په یو ساعت کې له ۵۰ تر ۹۵ کیلومترو پورې وي.
