کندهار کې د ملي بس نوې نمایندهګي پرانیستل شوه
د دولتي شرکتونو لوی ریاست خبر ورکړی چې د ملي بس دولتي شرکت له لوري په کندهار ولایت کې د ملي بس امریت نوې نمایندهګي پرانیستل شوې ده.
د یاد ریاست په وینا، د دې نمایندهګۍ په فعالېدو سره به د کندهار اوسېدونکو ته منظمې، خوندي او معیاري ترانسپورټي چوپړتیاوې وړاندې شي او د سفر اسانتیاوې به لا پراخې شي.
مسوولین وایي، د ملي بس دولتي شرکت د ترانسپورټي خدمتونو د پراختیا په موخه هڅې روانې دي او ټاکل شوې چې په نورو ولایتونو کې هم ورته نمایندهګۍ فعالې شي.
د یاد شرکت د چارواکو په خبره، د ترانسپورټي خدمتونو د کیفیت لوړول، د مسافرو خوندیتوب او د سفر اسانتیاوو زیاتول د دوی له مهمو لومړیتوبونو څخه دي.
