له پاکستانه نږدې ۸۰۰ افغان کډوال راخوشې او هېواد ته راستانه شول
د کډوالو او راستنېدونکو چارو وزارت خبر ورکړی چې د تېرې اوونۍ په ترڅ کې د پاکستان له بندخونو نږدې ۸۰۰ افغان کډوال ازاد او هېواد ته راستانه شوي دي.
د یاد وزارت د خبرپاڼې له مخې، له دې ډلې ۲۳۰ تنه د ننګرهار د تورخم او ۵۳۳ تنه نور د کندهار د سپین بولدک له لارې هېواد ته راستانه شوي دي.
د مسوولینو په وینا، یاد کسان د استوګنې د قانوني اسنادو د نه لرلو له امله تر بېلابېلو مودو پورې په بندخونو کې ساتل شوي وو.
خبرپاڼه زیاتوي چې دغه کسان د ثبت بهیر او د بشري مرستو له ترلاسه کولو وروسته خپلو اصلي سیمو ته لېږدول شوي دي.
