راشد خان: هڅه کوم فارسي ژبه ښه زده کړم
د افغانستان د کرېکټ ملي لوبډلې وتلي لوبغاړي راشد خان ویلي، که څه هم لا تر اوسه پر فارسي ژبه بشپړ تسلط نه لري، خو هڅه کوي دا ژبه په ښه ډول زده کړي، څو له خپلو مینهوالو سره په روانه او اسانه بڼه خبرې وکړای شي.
راشد خان څرګنده کړې چې د افغانستان او سیمې ګڼ مینهوال ترې غواړي په فارسي هم ورسره خبرې وکړي، او همدې غوښتنې هغه وهڅاوه چې د دې ژبې زدهکړه په جدي ډول تعقیب کړي. د نوموړي په وینا، د مینهوالو مینه او ملاتړ تل د ده لپاره ارزښت لري او غواړي د هغوی له غوښتنو سره سم لا ښه اړیکه ورسره وساتي.
هغه زیاته کړې چې د ژبې زدهکړه د خلکو ترمنځ د نږدې اړیکو، متقابل درناوي او ښه تفاهم لپاره مهمه ده، او هیله لري په راتلونکو سیالیو، مرکو او عامه پروګرامونو کې وکولای شي له خپلو فارسيژبو مینهوالو سره هم په همدې ژبه خبرې وکړي.
راشد خان د افغانستان د کرېکټ له تر ټولو مشهور او بریالیو لوبغاړو څخه شمېرل کېږي او د نړۍ په بېلابېلو سوداګریزو لیګونو کې د خپلو غوره لوبو له امله پراخ شهرت لري. هغه تل هڅه کړې چې له خپلو مینهوالو سره نږدې اړیکه وساتي او د هغوی مینه او ملاتړ د خپلې بریا مهم لامل بولي.
