جاپان د نورستان سېلاب ځپلو کورنیو سره خواخوږي څرګنده کړه
په افغانستان کې د جاپان سفارت د نورستان ولایت مرکز پارون او یو شمېر نورو سیمو کې د وروستیو سېلابونو له امله پر اوښتې مرګژوبلې خواشیني څرګنده کړې او له قربانیانو او زیانمنو کورنیو سره یې خپله خواخوږي ښودلې ده.
د سفارت په اعلامیه کې ویل شوي چې سفیر ماساموتو د سېلابونو قربانیانو کورنیو ته د تسلیت مراتب وړاندې کړي او ټپیانو ته یې د عاجلې روغتیا هیله کړې ده.
تر دې وړاندې، په کابل کې د ایران اسلامي جمهوریت سفارت هم په نورستان کې د سېلابونو له امله پر رامنځته شوي ناورین خواشیني څرګنده کړې وه او له زیانمنو شویو کورنیو سره یې د همدردۍ پیغام شریک کړی و.
د معلوماتو له مخې، وروستیو سېلابونو چې د نورستان مرکز پارون او یو شمېر نورې سیمې یې ځپلې، لسګونه کسان پکې مړه شوي، له ۸۰ ډېر کسان ټپیان شوي او څه باندې ۱۰۰ کسان لا هم لادرکه دي.
