کابل کې د ۱۶ کسیزې وسلهوالې غلاکوونکې ډلې غړي ونیول شول
د کابل امنیې قوماندانۍ د یوې ۱۶ کسیزې وسلهوالې غلا کوونکې ډلې د نیولو خبر ورکړی او ویلي یې دي چې یادو کسانو د ښار په بېلابېلو سیمو کې په غلاوو کې لاس درلود.
د امنیې قوماندانۍ د خبرپاڼې له مخې، دغې ډلې څه موده وړاندې د اتمې امنیتي حوزې اړوند د بینيحصار په سیمه کې د یوه کور د غلا پر مهال دوه کسان وژلي او یو بل یې ټپي کړی و.
سرچینه زیاتوي چې د اتمې امنیتي حوزې پولیسو د کشفي او استخباراتي عملیاتو په ترڅ کې د دې ډلې ټول ۱۶ غړي نیولي دي.
د خبرپاڼې له مخې، نیول شویو کسانو په لومړنیو څېړنو کې پر خپلو جرمونو اعتراف کړی دی.
د عملیاتو پر مهال له یادې ډلې څخه دوه عرادې موټر او پنځه میله تمانچې هم ترلاسه شوې دي.
د کابل امنیې قوماندانۍ ویلي، نیول شوي کسان تر قانوني څېړنو لاندې دي او له بشپړو څېړنو وروسته به عدلي او قضايي ارګانونو ته وسپارل شي.
په وروستیو میاشتو کې د کابل په ځینو سیمو کې د وسلهوالو غلاوو راپورونه زیات شوي، چې د ښاریانو اندېښنې یې هم راپارولې دي.
په همدې حال کې، د اسلامي امارت د کورنیو چارو وزارت ډاډ ورکړی چې د امنیت د ټینګښت او د عامه نظم د ساتنې لپاره به د جرمونو د مخنیوي او د قانون ماتوونکو د نیولو هڅې په جدي ډول دوام ومومي.
د یادونې وړ ده چې تر دې وړاندې هم په کابل او یو شمېر نورو ولایتونو کې د وسلهوالو غلو څو ډلې د امنیتي ځواکونو له لوري نیول شوې دي.
