فطرت: هوښیار شئ، له خوبه راویښ شئ؛ د نظام پر وړاندې دسیسو ته ځای نشته.
قاري فصیحالدین فطرت، د وسلهوالو ځواکونو لوی درستیز، د هېواد خپلواکۍ بېرته ترلاسه کولو ۱۰۷مې کلیزې په مراسمو کې ویلي، هغه کسان چې د بهرنیانو په لارښوونه له هېواده وتلي او اوس له بهر څخه د اسلامي نظام پر وړاندې توطئې کوي، باید پوه شي چې د اسلامي امارت پیاوړی نظام نه شي له ننګونو سره مخ کولی.
فطرت هغوی ته په خطاب کې ویلي: «هوښیار شئ او له خوبه راویښ شئ؛ د اسلامي نظام پر وړاندې د توطئو پر ځای، راشئ له خپل ولس سره په ازادۍ او عزت ژوند وکړئ.»
نوموړي ټینګار کړی چې د اسلامي امارت دروازې د یادو کسانو پر مخ پرانیستې دي او د عفوې لمن یې پراخه ده؛ خو زیاته کړې یې ده، که څوک تېروتنه وکړي، امنیتي ځواکونه به یې پر وړاندې سخت او کوټلی غبرګون وښيي.