اوکراین: روسیه زموږ پر وړاندې ۱۰ زره شمالي کوریايي سرتېري ځای پر ځای کوي
د اوکراین ولسمشر ولودیمیر زلنسکي ویلي، شاوخوا ۱۰ زره شمالي کوریايي سرتېري روسیې ته د لېږلو لپاره د چمتووالي په حال کې دي.
زلنسکي په یوه ویډیويي پیغام کې ویلي، د اوکراین استخباراتي ارزونو له مخې، دغه سرتېري روزنه ترلاسه کوي او د روسیې لپاره د ماموریت چمتووالی یې روان دی.
نوموړي زیاته کړې چې اوس مهال له ۸ زرو ډېر شمالي کوریايي سرتېري په روسیه کې مېشت دي.
د اوکراین چارواکي وايي، د دغو ځواکونو یوه برخه د روسیې په کورسک سیمه کې ځای پر ځای شوې، چې له اوکراین سره ګډه پوله لري.
زلنسکي همداراز ادعا کړې چې مسکو د پوځي ملاتړ په بدل کې پیونګیانګ ته دفاعي ټکنالوژي او د بېپیلوټه الوتکو اړوند تخنیکي معلومات ورکوي.
د اوکراین او جنوبي کوریا چارواکو تر دې وړاندې هم د روسیې او شمالي کوریا ترمنځ د پوځي همکاریو د پراخېدو په اړه اندېښنه څرګنده کړې وه؛ خو د دغو همکاریو د کچې او ټکنالوژۍ د لېږد په اړه ټول جزئیات لا هم د چارواکو پر څرګندونو او استخباراتي ارزونو ولاړ دي.
