د عراق په چاودنو کې د اوکراین د لاس لرلو ادعا
د عراق د ملي امنیت سلاکار قاسم عبودي ویلي، په دغه هېواد کې د وروستیو چاودنو په تړاو نیول شوې یوه ډله اعتراف کړی چې د اوکراین لپاره یې فعالیت کاوه، خو ټینګار یې کړی چې د بشپړو څېړنو تر پای ته رسېدو مخکې د دې پېښې په اړه وروستۍ پرېکړه نه شي کېدای.
عبودي د دجلې ټلوېزیوني شبکې سره په خبرو کې ویلي، امنیتي ځواکونو هغه څو کسیزه ډله نیولې چې د عراق ځینې دولتي تاسیسات یې په نښه کړي وو.
د هغه په وینا، لومړني معلومات د اوکراین د احتمالي لاسوهنې نښې ښيي، خو د موضوع د روښانتیا لپاره لا هم پلټنې روانې دي.
دا څرګندونې وروسته له هغې شوې چې د عراق د کردستان سیمې په مرکز اربیل کې لږ تر لږه اووه چاودنې وشوې.
د راپورونو له مخې، لومړۍ چاودنه د سېشنبې ورځې په سهار ترسره شوې ده.
د دجلې ټلوېزیوني شبکې د راپور له مخې، یادې چاودنې دولتي تاسیسات په نښه کړي دي.
بلخوا، د ایران تسنیم خبري اژانس ادعا کړې چې چاودنې د خلیفان او سوران په سیمو کې د ایران مخالفو کردي وسلهوالو ډلو پر مرکزونو شوې او ویلي یې دي چې دغه بریدونه د بېپیلوټه الوتکو له لارې ترسره شوي دي.
تر اوسه د اوکراین حکومت د دغو ادعاوو په اړه رسمي غبرګون نه دی ښودلی.
د پېښې د څرنګوالي او د مطرح شویو ادعاوو د کرهوالي په اړه پلټنې لا هم دوام لري.
