څلورو ولایتونو کې د ۲۶۹ میلیونه افغانیو په لګښت نوي مخابراتي انتنونه جوړېږي
د مخابراتو او معلوماتي ټکنالوژۍ وزارت وايي، په څلورو ولایتونو کې د څه باندې ۲۶۹ میلیونه افغانیو په لګښت لسګونه نوي مخابراتي انتنونه جوړېږي.
د وزارت ویاند عنایتالله الکوزي ویلي، دغه انتنونه په کندهار، هلمند، پکتیکا او زابل ولایتونو کې د ۱۳ ولسوالیو په اړوندو سیمو کې جوړېږي او تړون یې له افغان بیسیم شرکت سره لاسلیک شوی دی.
د الکوزي په وینا، انتنونه په هغو سیمو کې نصبېږي چې تر اوسه یې اوسېدونکي مخابراتي خدمتونو ته لاسرسی نه لري.
هغه زیاته کړې، د انتنونو له جوړېدو سره به په یادو سیمو کې د مخابراتي خدمتونو د لاسرسي کچه لوړه شي.
بلخوا، د هېواد په یو شمېر لرې پرتو سیمو کې اوس هم خلک مخابراتي خدمتونو ته د نه لاسرسي له ستونزې سره مخ دي او په دې برخې کې د نویو انتنونو د جوړېدو غوښتنه کوي.
