ایران وایي له عمان سره سمندري تفاهم د هرمز تنګي سره تړاو نه لري
د ایران د بهرنیو چارو وزارت ویاند، اسماعیل بقايي، ویلي چې له عمان سره د نوي خوندي سمندري مسیر د رامنځته کولو په اړه د ایران تفاهم د هرمز تنګي د پرانیستل کېدو یا تړل کېدو له موضوع سره هېڅ تړاو نه لري.
د نوموړي په وینا، د هرمز تنګي او د خوندي سمندري مسیرونو د تنظیم په اړه د ایران او عمان ترمنځ خبرې له څه مودې راهیسې روانې دي او دواړه هېوادونه، د ساحلي دولتونو په توګه، د خپلو ګډو مسؤلیتونو له مخې د سمندري لارو د امنیت او مدیریت په برخه کې همکاري کوي.
بقايي ټینګار کړی چې د ایران او عمان ترمنځ شوی تفاهم د هرمز تنګي د وضعیت له بدلون سره تړاو نه لري او د دواړو هېوادونو همکاري د سمندري تګراتګ د امنیت او همغږۍ د پیاوړتیا په موخه ترسره کېږي.
هغه همداراز ویلي، د هرمز تنګي په اړه د ایران دریځ روښانه دی او د یاد تفاهم په اړه ځینې مطرح شوې څرګندونې له واقعیت سره سمون نه لري.
دا څرګندونې وروسته له هغې وشوې چې د امریکا ولسمشر ډونالډ ټرمپ ادعا وکړه، ایران د هرمز تنګي د بېرته پرانیستلو وړاندیز کړی او همدې موضوع د امریکا د پلان شویو پوځي اقداماتو په پرېکړه اغېز کړی دی.
د ایران د بهرنیو چارو وزارت بیا د خپلو وروستیو څرګندونو له لارې ټینګار کړی چې له عمان سره تفاهم له دغو ادعاوو سره هېڅ تړاو نه لري.
